Менам-Чао-Прая

Менам-Чао-Прая, Менам – Индикытай жарым аралындагы дарыя, Тайланддагы дарыялардын эң чоңу. узундугу 1200 кмдей (негизги куймасы – Пинг дарыясынын башатынан 1500 км), алабынын аянты 150 миң км²дей. Өлкөнүн түндүгүндөгү тоолордон башталып, Менам ойдуңу аркылуу агып, түштүк Кытай деңизинин Сиам булуңуна куярда дельтаны пайда кылат. Жамгырдан куралат, режими муссондук. Жайында суусу мол, орточо чыгымы төмөнкү агымында 2700 м3/секдай. Негизинен шалы талаалары сугарылат. Чатынан 400 кмге (Пинг дарыясынын чатына чейин), суу кирген маалда 750 кмге (Уттарадит шаарына дейре) кеме жүрөт. Сал агызылат. Дельтасында Бангкок шаары жайгашкан.

Колдонулган адабияттар

• “Кыргызстан” улуттук энциклопедиясы: 5-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. илл. ISBN 978 9967-14-111 -7