'''Изотоптор''' - (изо... жана гр. topos орун) — [[Элементтердин мезгилдик системасы|элементтердин мезгилдик системасында]] бир орунда жайгашкан бир эле химиялык элементтин [[Атомдук масса|атом массасы]] менен айырмаланган түрлөрү. Изотоптордун атом ядросу бири биринен нейтрон саны менен айырмаланат, ал эми протондорунун саны бирдей. Нейтрон бейтарап бөлүкчө, ал ядронун зарядын өзгөртпөйт. Берилген элементтин изотопторунун химиялык касиеттери негизинен окшош, атом массалык санына жараша алардын ядро-физикалык касиеттери (ядронун туруктуулугу же туруксуздугу, жарым ажыроо мезгили ж. б.) түрдүүчө. Изотоптор туруктуу жана радиоактивдүү болуп айырмаланат. «Изотоптор» терминин 1910-ж. англиялык окумуштуу Ф. Содди киргизген. Изотопторду кыскача белгилөө үчүн химиялык элементтин символунун сол жак даражасына изотоптордун массалык саны көрсөтүлөт, мисалы,<sup>16</sup>0, <sup>17</sup>0, <sup>18</sup>0 кычкылтек изотоптору.
