Авогадро Амедео (9.8.1776, Турин 9.7.1856, ошол эле жерде) италиялык физик жана химик. Алгач юридикалык билим алып, кийин физика, математика илимдерин окуган. Турин ИАнын корреспондент мүчөсү (1804), академик (1819), физика-математика бөлүмүнүн директору. 1806-19-ж. Турин университетинин лицейинде физика мугалими, 1820-22ж-а 1834-50-ж. профессор. Эмгектери физика жана химиянын ар кандай бөлүмдөрүнө (электр, электр-химиялык теория, салыштырма жылуулук сыйымдуулук, капиллярдуулук жана башка) арналган. 1811-ж. заттардын түзүлүшү жөнүндөгү молекулярдык божомолду, атом жана молекулярдык массаны аныктоо ыкмасын сунуш кылып, газ закондорунун бирин ачкан (Авогадро закону), 1 моль идеалдык газдын молекулярдык саны, универсалдуу турактуулук Авогардонун аты менен аталган (Авогадро саны). Авогардо 4 томдук физикалык-химиянын элементтерин камтыган молекулярдык физика китебинин автору.

Авогадро, Амедео

Колдонулган адабияттар түзөтүү

  • “Кыргызстан”. Улуттук энциклопедия: 1-том. Башкы ред. Асанов Ү. А., Б.: Мамлекеттик тил жана энциклопедия борбору, 2006. ISBN 9967—14— 046—1