Гарри Поттер жана Канзаада чалыш (тасма)
"Гарри Поттер жана Канзаада чалыш" (англ. Harry Potter and the Half-Blood Prince, орус. Гарри Поттер и Принц-полукровка) — 2009-жылы тартылган британ-америка фантастикалык тасмасы. Режиссеру Дэвид Йейтс, жайылткан Warner Bros. Pictures. Жоан Кэтлин Роулиңдин ушул эле аталыштагы романына негизделип тартылган. "Гарри Поттер" сериясындагы 6-тасманын сценарийин Стив Кловз жазган, продюсери Дэвид Хейман менен Дэвид Баррон. Кинотасмада Гарри Поттердин Хогвартстагы алтынчы жылы тууралуу баяндалат. Ал сырдуу китепке катуу байланып, сүйүүгө кабылып калат жана Лорд Волдеморттун кулашы үчүн эс тутумундагы ачкычты эстөөгө аракет кылат.
Тасмада Дэниел Рэдклифф Гарри Поттердин образын жаратат. Аны менен кошо Руперт Гринт (Рон Уизли) менен Эмма Уотсон (Гермиона Грейнжер) Гарринин эң жакын досторунун ролдорун аткарышат. Бул тасма "Гарри Поттер жана Феникс орденинен" кийин жана "Гарри Поттер жана Өлүмдүн тартуусу — 1-бөлүм" фильминен мурун тартылган.
Кинотасма 82-Оскар сыйлыгынын "Эң мыкты оператордук иш" номинациясы менен Британ киноакадемиясынын "Эң мыкты визуалдык эффекттер" жана "Эң мыкты сүрөтчү-коюучу" номинацияларына көрсөтүлгөн. "Канзаада чалыш" киносынчылардын арасында бул сериядагы эң жылуу кабыл алынган тасма болуп саналат. Фильм жарык көрөөрү менен эле Rotten Tomatoes жана Metacritic ой-пикир агрегаторлорунда эң жогору бааланган "Гарри Поттер" тасмасы болууга жетишкен. Сынчылар тасманын окуясын "эмоционалдык жактан канааттандыраарлык" деп аташып, Йейтстин режиссурасын, оператордук ишти, Рэдклиффтин, Уотсондун, Гринттин, Гэмбондун жана Броадбенттин актердук чеберчиликтерин, көрнөктөрдү жана Николас Хупердин композициясын макташкан.