Глауконит

Глауконит, главконит (грекче glaukjs – көк жашыл) – гидрослюдалар тобундагы минерал; темирдин суулуу алюмосиликаты. Химиялык формуласы (K, Na, Ca)(Fe³+, Mg, Fe²+, Al)₂[(Al, Si) Si₃O₁₀](OH)₂ H₂O. Моноклин сингониясында кристаллданат. Өңү жашыл, саргыч жашыл, кээде түссүз. Катуулугу Моос шкаласы боюнча 2–3; тыгыздыгы 2,2–2,9 г/см². Морт глауконит негизинен деңиз түбүндө пайда болгон чөкмө тоо тектерде (акиташтеги, кумдук, алевролит ылай ж. б.) кезигет. Сууну өзүнө сиңирип жана катион алмаша ала тургандыктан, глауконит туздуу сууларды тазартууда, курамында калий арбын болгондуктан, жер семирткич катары жана жашыл боёк даярдоодо колдонулат.

Глауконит.

Колдонулган адабияттар

• “Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055-4