Еврей автономия облусу

Еврей автономия облусу.

Еврей автономия облусу Россия Федерациясынын субъектиcи. Россиянын Чыгыш федерация округуна кирет. Амур боюнда жайгашкан. Облус 1934-ж. 7-майда уюшулган. Кытай менен чектешет. Аянты 36 миң км2. Калкы 186,5 миң (2006). Борбору – Биробижан шаары. Шаар калкы 66,3%. Административдик-аймак жактан 5 административдик районго, 2 шаарга, 11 шаарчага бөлүнөт. Облуста орус (89,9%), украин (4,4), еврей (1,2), татар, беларус жана башка улут өкүлдөрү жашайт. Табигый айма­гынын 12% коргоого алынган. Алар Бастак коругу, 6 заказник, 25 табият эстелиги (анын ичинде гидрология, геология, ботаникалык жана башка бар). Түндүк-батышы менен түндүгүндө Кичи Хинган жана Бурея кырка тоолору (бийикт. 1421 м), Түштүк-чыгышында Ортоңку Амур ойдуңу орун алган. Климаты мелүүн муссондук. Январдын орточо температурасы – 21–25°Сден (түздүктөрүндө) –30°Сге чейин (тоолордо), июлдуку 20–22°С, жылдык жаан-чачыны 500–800 мм. Негизги дарыясы – Амур. Токойдун күрөң, шалбаа-саз жана аллювий топурактары мүнөздүү. Аймагынын 1/3ин токой ээлеп, анда ийне жалбырактуу токой басымдуу. Кен байлыктардан темир, марганец, калай, алтын, көмүр, графит, тальк, брусит жана башка казылып алынат. Кульдур курорту иштейт.

ЭкономикасыОңдоо

Региондун дүң продукциясы 4782,8 млн рублди түзөт; андагы өнөр жайдын үлүшү 15,3% (2001). Башкы өнөр жайдын тармактары: курулуш материалдары, электр-энергетика, машина куруу, жыгаччылык, целлюлоза-кагаз, жеңил. Ошондой эле «Зима» кийиз чокой жана кондитер фабрикалары, эт комбинаты иштейт. Күрөң көмүр, магний казылып алынат. Региондун дүң продукциясында айыл чарбанын үлүшү 13,9% (2001). Айыл чарбага жарактуу жери 537,2 миң га (жер фондунун 14,8%), анын ичинде айдоо аянты 17,2%. Дан эгиндери, соя, картөшкө, жашылча айдалат. Техника өсүмдүктөр басымдуу (61,8%). Эт-сүт багытындагы мал чарбачылыгы жана чочко асыралат. Аары чарбасы өнүккөн. Техника жолунун узундугу 513 км, автомобилдики 1533 км, суу жолунуку 685 кмдей. Амур жана Тунгуска дарыясында кеме жүрөт. Төрт ЖОЖ, 2 театр, филармония, 3 музей, облустук китепкана (2003) бар.

Колдонулган адабияттарОңдоо

  • “Кыргызстан” Улуттук энциклопедия: 1-том. Башкы ред. Асанов Ү. А., Б.: Мамлекеттик тил жана энциклопедия борбору, 2006. ISBN 9967—14—046—1