Кванже

Кванже – Корей Республикасынын түштүк-батышындагы шаар. Йонсанган түздүгүндө, Сеулдан 320 км түштүктө жайгашкан. 1986-жылдан шаар айланасы менен провинциянын деңгээлиндеги статуска ээ. Калкы 1,3 млн (2008; шаар айланасы менен 1,6 млн). Жолдор тоому. Метрополитен (2004) иштейт. Алгач Корё мамлекетин негиздеген король Ван Гон бийлеген мезгилде 940-жылы эскерилген. 1948–2005-жылдары Чолла-Намдо провинциясынын административдик борбору болгон. Шаар агломерациясынын чыгыш бөлүгүн Мудынсан паркы ээлейт. Анын этегинде будда храмдары жайгашкан. Кванже өлкөнүн ири өнөр жай борбору. «Kia Motors» компаниясынын автомобиль заводу (жылына 350 миң), аккумулятор батареялары, электроника приборлорун жана алардын компоненттерин өндүрүүчү, текстиль (кебез-кездеме), тамак-аш (айыл чарба азыктарын белендейт жана сактайт) өнөр жай ишканалары иштейт. Тогуз жогорку окуу жайы (анын ичинде улуттук, педагогикалык жана жеке менчик), музейлер (анын ичинде улуттук, көркөм жана башка), мемориалдык парк бар. Айыл чарбалуу аймактын ири борбору. Шалы, курма өстүрүү, жүзүмчүлүк өнүккөн. Шаардан 50 км түндүк-батышта «Йонгван» АэСи (Азиядагы эң ири; кубаттуулугу 5900 МВт) курулган.

Колдонулган адабияттар

• “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104 -9