«Кыргызтелефильм»

«Кыргызтелефильм» — КТРКнын телефильмдерди чыгаруучу студиясы. 1969-жылы чыгармачыл бирикме катары уюшулуп, 1973-жылы студияга айланган. Студия чыгарган алгачкы көркөм телефильм «Ак Мөөр» (режиссёр М. Убукеев), Кыргыз эл акыны А. Токомбаевге арналган «Күүнүн сыры» (автору У. Токомбаев), «Көз айнекчен» (режиссёр А. Видугирис; 47 өлкө сатып алган), «Сокур кемпир көрөгөч», «Той» (режиссёр А. Айтыкеев) аттуу фильмдер фестивалдардын байге, дипломдоруна татыган. Республикада «Ой-Арт», «Бегим», «Айтышфильм» ж. б. менчик студиялар да иштейт. «Кыргызтелефильм» студиясынын туңгуч директору жана башкы редактору: К. Өмүркулов, кийин У. Токомбаев (башкы редактору) болгон. Студиянын директорлору: И. Усубакунов, Э. Сарыбаев, К. Орозалиев, Г. Базаров, Т. Ибрагимов, 2006-жылдан А. Жангазиев.

Колдонулган адабияттар

• “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104 -9