Ак-Сай мөңгүлөрү

Ак-Сай мөңгүлөрү — Кыргыз Ала-Тоосунун түндүк тармагы-Аюу-Төрдүн батыш капталындагы жанаша жаткан 2 мөңгү (Чыгыш жана Батыш). Ала-Арча суусунун алабынан орун алган. Өрөөн тибиндеги мөңгүлөргө кирет. Чыгыш Ак-Сай мөңгүсүнүн узундугу 6,2 км, аянты 4,1 км². Мөңгүнүн башы деңиз деңгээлинен 4870 м, этеги 3220 м бийиктикте жатат. Кар чегинин бийиктиги 4120 м. Батыш Ак-Сай мөңгүсүнүн узундугу 6,4 км, аянты 4,4 км². Деңиз деңгээлинен эң бийик жаткан жери 4840 м, этеги 3220 м. Кар чегинин бийиктиги 4120 м. Мөңгүлөр акырындап чегинүүдө. Этек мореналары даана байкалат. Алардан Ак-Сай суусу башталып, Ала-Арчага оң тараптан куят.

Колдонулган адабияттар

• “Кыргызстан”. Улуттук энциклопедия: 1-том. Башкы ред. Асанов Ү. А., Б.: Мамлекеттик тил жана энциклопедия борбору, 2006. ISBN 9967—14— 046—1