Алай книдиокарпасы

Алай книдиокарпасы (Cnidiocarpa alaica), (M. Pimen) - Поликарптуу көп жылдык өсүмдүк. Тамыр сабагы жерге туурасынан төшөлүп өсөт. Тамыр моюнчасындагы жалбырактары кыска ланцеттей, кырлары ак кыюусу менен, жалбырак кучактуу, сыртынан үч бурчтуу, биринчи жана экинчи сегменттери көңдөй, кыска жалбырак саптуу, арткы бөлүктөрү ланцеттей же жумуртка сымал ланцеттей, кырлары кичинекей айчыктуу же тегиз эмес тишчелүү. Сабактагы жалбырактары кыска саптуу же сапсыз, сабакты толугу менен курчаган жалбырак кучактуу. Сабагы бирөө же бир нече болот. Тамыр моюнчасынан өскөн жалбырактары ланцеттей же созулуңку жумурткадай, жээги майда айчыктуу же майда тишчелүү. Сабактагы жалбырактары кыска саптуу же сапсыз, колтуктуу. Чатырча топ гүлү 15-40 нурдуу, алар шибегедей учтуу ороочтуу же ороочсуз; чатырчалары 20-30 гүлдүү, алар туурасы 2-4 мм келген ороочтуу.

Биологиялык өзгөчөлүктөрү

Июлда гүлдөп, августта мөмөлөйт.

Жалпы жана өлкөдө таралышы

Алай кырка тоосунун түштүк беттери, Тажикстан менен чектешкен жердеги Карамык айылынын тегереги.

Өсүү шарттары

Агын суулардын жээктериндеги саздуу аймактар.

Саны

Топ-топ болуп аз санда кездешет.

Чектөөчү факторлор

Белгисиз.

Өстүрүү

Маалыматтар жок.

Уюштурулган коргоо аракеттери

Коргоого алынган эмес.

Коргоо үчүн зарыл аракеттер

Сан- өлчөмүн тактап, түр өскөн жерлерди корукка алууну камсыз кылуу.

Статусу

VU. Монотиптик тукумдун сейрек кездешкен өкүлү.

Колдонулган адабияттар

• Кыргыз Республикасынын Кызыл китеби 2-басылышы – Бишкек: 2006. – 544 б. – ISBN 9967-23-367-2