Арбитраждык соттор

Арбитраж (фр. arbitrаge) – тараптар тарабынан жарандык укук мамилелеринен келип чыккан талаш-тартыштарды чечүү үчүн шайланган (дайындалган) бейтарап сот.

Арбитраждык соттор – менчигинин түрүнө карабастан, чарбакер субъектердин ортосундагы экономикалык мамилелер жаатында сот адилеттигин ишке ашыруучу орган. КРде Арбитраждык соттор 1992-жылы Мамлекеттик арбитраждын базасында түзүлгөн; КР Конституциясына жаңы редакциясы кабыл алынышы менен (2003-жылдын 18-февралынан) жалпы юрисдикциядагы соттор менен бириктирилген. Облустук жана Бишкек шаарынын Арбитраждык соттору облустагы жана Бишкек шаарындагы административдик жана экономикалык иштер боюнча райондор аралык сотторго кайра түзүлүү менен, сот иштерин баштапкы баскыч катары карайт. Облустук жана Бишкек шаарынын сотторунда баштапкы баскычтагы соттордун чечимдерине карата апелляциялык жана кассациялык тартипте карай турган административдик жана экономикалык иштер боюнча сот коллегиясы бар. КР Жогорку Арбитраждык соту административдик жана экономикалык иштерди көзөмөл иретинде карай турган сот коллегиясы катары КР Жогорку сотунун курамына кирди.