Астрономиялык пункт

Астрономиялык пункт - географиялык координаталары жана бир нерсеге карай багытталган азимуту астрономиялык жол менен (асман жылдыздарына жүргүзүлгөн байкоолордун негизинде) аныкталган жер бетиндеги чекит. Астрономиялык пункт жер бетинде кирпич же бетондон тургузулган бийиктиги 1 м келген мамылар менен белгиленип, астрологиялык байкоолор ошол чекиттен жүргүзүлөт. КМШ өлкөлөрүндө астрономиялык пункттар астрономиялык аныктоолордун тактыгына карай 4 класска бөлүнөт. I, II класстагы астрономиялык пункт 70-100 км аралыкта болуп, Жердин келбетин жана көлөмүн аныктоо үчүн, III, IV класстагылары ар түрдүү аралыкта жайгаштырылып, жер бетинин топографиялык карталарын түшүрүүдө же геодезиялык кээ бир изилдөөлөрдө пайдаланылат.

Колдонулган адабияттар

• “Кыргызстан”. Улуттук энциклопедия: 1-том. Башкы ред. Асанов Ү. А., Б.: Мамлекеттик тил жана энциклопедия борбору, 2006. ISBN 9967—14— 046—1