Афазия (медицинада)
Афазия (медицинада) (грекче aphasia - сүйлөй албоо) сүйлөөнүн бузулушу. Мында бирөөнүн сөзүн түшүнбөйт же бир аз түшүнөт, ошондой эле өзүнүн оюн түшүндүрүү үчүн сөз, фраза айта албайт. Афазия көбүнчө мээнин сол жарым шарынын кыртышы жабыркаганда болот. Негизинен эки түргө кыймыл жана сенсордук афазия болуп бөлүнөт. Кыймыл афазиясында оорулуунун сүйлөө аппараттары, акыл-эси ордунда болуп, айтылган сөзгө түшүнөт, бирок сүйлөй албайт. Сенсордук афазияда оорулуу сүйлөөгө жөндөмдүү болуп, бирок сөздү түшүнбөйт. Сенсордук афазиянын бир түрү болгон амнестия афазиясында оорулуу башынан өткөн окуяларды, буюмдун атын, бирөөнүн аты-жөнүн эстей албаганы менен аны колдонууну билет. Сүйлөөнүн бузулушу мээге кан куюлганда, тромбоздоо, мээ травмага учураганда, сезгенгенде, шишик ооруларында көп байкалат. Ооруну дарылоо үчүн аны пайда кылган себептерди аныктап, жоюу максатка ылайык.
Колдонулган адабияттар
түзөтүү- “Кыргызстан”. Улуттук энциклопедия: 1-том. Башкы ред. Асанов Ү. А., Б.: Мамлекеттик тил жана энциклопедия борбору, 2006. ISBN 9967—14— 046—1