Битум

Битум (лат. bitumen чайыр, асфальт) сууда эрибеген, катуу же суюк углеводороддун жана алардын суутектүү, күкүрттүү, азоттуу бирикмелеринин аралашмасы. Тыгыздыгы 1000 кг/м3га жакын, 25-90 С температурада жумшарат. Табигый жана жасалма (нефтини буулантып, крекингдеп, майды тазалоодон калган калдыктардан алынуучу) болуп бөлүнөт. Битум табигый кендерде кездешет же нефть иштетүүдө калдык продукт катары алынат. Битум сиңирилген рубероид үйдүн чатырын жабуучу материал жана суу өткөрбөгүч (гидроизоляциялык) катмар катары кеңири колдонулат. Битумдан жасалган боёк ар кандай темир буюмду дат басуудан сактайт жана курулушта байыртадан байланыштыргыч материал катары цементтин ролун аткарган. Бетон өндүрүшүндө колдонулуучу толтургуч зат (шагыл жана башкалар) менен аралаштырып, жолдун таманын жапса болот. Табигый битум нефтинин (асфальт), ташкөмүрдүн, күрөң көмүрдүн, чымкөңдүн курамында бар, бензолдо, күкүрттүү көмүртекте, хлороформдо жана башкада эрийт.

Дагы караңыз

Колдонулган адабияттар

«Кыргызстан». Улуттук энциклопедия: 2-том. /Башкы ред. Асанов Ү. А. К 97 Б.: Мамл. тил жана энциклопедия борбору, 2007. 808 бет, илл. ISBN 978 9967-14-055-4