Борис Асафьев
Acафьев Борис Владимирович - ((псевдоними Игорь Глебов), 17(29).7. 1884, Петербург - 27. 1. 1949, Москва) - орус музыка изилдөөчү, композитор, педагог. СССР ИАсынын академиги (1943), СССР эл артисти (1946). Петербург университетин (1908), Петербург консерваториясын бүткөн (1910). 1919-30-ж. Ленинград искусство тарыхы институтунда иштеген. 1925-жылдан Ленинград консерваториясында профессор. Москвада 1943-жылдан эмгектенет. Асафьев орус жана чет өлкөлөрдүн музыкалык маданияты, музыка теориясынын маселелери боюнча илимий эмгектердин жана сын макалалардын автору. Советтик композиторлордун Бүткүл союздук 1-съездинде (1948) СССР композиторлор союзунун председатели болуп шайланган. 11 опера, 28 балет, 4 симфония, бир нече романс, камералык-аспаптык ж. б. чыгармаларды жазган. Белгилүүлөрү: «Париж жалыны» (1932), «Бахчисарай фонтаны» (1934), «Кавказ туткуну» (1938) ж.б. Асафьев СССР мамлекеттик сыйлыгынын эки жолку лауреаты (1943, 1948). Эки Ленин ордени, Эмгек Кызыл Туу ордени менен сыйланган.
Колдонулган адабияттар
түзөтүү- “Кыргызстан”. Улуттук энциклопедия: 1-том. Башкы ред. Асанов Ү. А., Б.: Мамлекеттик тил жана энциклопедия борбору, 2006. ISBN 9967—14— 046—1