Георгий Вицин

Вицин Георгий Михайлович (23. 4. 1918, Петроград — 22. 10. 2001, Москва) – орус актёру, СССР эл артисти (1990). Вахтангов атындагы театр окуу жайында, МХАТтын алдындагы студияда окуган. 1937-жылдан Ермолова атындагы театрда, 1969-жылдан киноактёрлор театр-студиясында иштеген. Вицин курч мүнөздөгү комедиялык актёр болуп саналат. 1945-жылдан киного тартылган. «Көлөкө», «Жазындагы жомок» (экөө тең 1972-ж.) телефильмдеринде чебер ойногон. Реж. Л. И. Гайдайдын «Эң олуттуу» (1961), «Самогончулар» (1962), «Операция “Ы” жана Шуриктин башка жоруктары» (1965), «Кавказ туткуну» (1967) кинокомедиясында Коркоктун (Трус) образын өтө чыгармачылык менен түзгөн. Кинодогу башка ролдору: Н. В. Гоголь («Композитор Глинка», 1952; «Белинский», 1953), Эндрю сэр («Он экинчи түн», 1955), Каррасио («Дон Кихот», 1957), Сэм («Ишкер адамдар», 1963), Бальзаминов («Бальзаминовдун үйлөнүүсү», 1965), Хмырь («Жолдуу сыпайы», 1972), Сахар («Көк чымчык», 1976, советтик-амер.), Тахво Кекконен («Ширеңке издеп», 1980, советтик-финндик), Фонди-Монди («Колуңду көтөр!», 1981) ж. б. 80ден ашуун анимациялык фильмдерге үн кошкон.

Георгий Вицин орус. Вицин Георгий Михайлович
Төрөлгөндөгү ысымы:	Георгий Михайлович Вицын
Туулган датасы:	23 -апрель 1918(1918-04-23)
Туулган жери:	Петроград Орусия империясы
Өлгөн датасы:	22 -октябрь 2001(2001-10-22) (83 жаш)
Өлгөн жери:	Москва, Орусия
Жарандыгы:	СССР → Орусия
Кесиби:	театр жана кино актёр
Карьерасы:	1936—1995
Багыты:	Комедия
Сыйлыктары:
IMDb:	ID 0900120

Колдонулган адабияттар

• “Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055 -4