Гидросфера

Гидросфера — Жер шарындагы бардык суу объектилеринин жыйындысы. Океандар менен деңиздердин жана кургактыктагы ж. б. суу объектилерин (дарыя, көл, саз) бүт камтыйт. Ага жер астындагы суулар, уюлдардагы муздар, бийик тоолордогу мөңгүлөр, жаан-чачын, тирүү организмдердин денесиндеги суулар кирет. Суулардын көбү океан менен деңиздерде (96%), ал эми жер астында 2%, Арктика жана Антарктикадагы көп жылдык муз менен карда 2%. Гидросферанын жалпы массасында кургактыктагы суулардын үлүшү эң эле аз, бирок жер бетиндеги тиричилик үчүн алардын мааниси зор. Гидросфера суулары атмосфера, жер кыртышы (литосфера) жана биосфера менен дайыма өз ара тыгыз байланышта. Бул байланыштын натыйжасында суунун Жер шарындагы айланышы жүрөт. Жер бетиндеги азыркы тиричилик адегенде гидросферада башталып, кийин палеозой заманынын башталышында гана кургактыкка өткөн.

Булактар

• “Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055 -4