Жанна д'Арк
Жанна д'Арк — (6. 1. 1412, Лотарингия, Домреми кыштагы – 30.5. 1431, Руан) – Франциянын улуттук баатыры. Жүз жылдык согуш (1337–1453) мезгилинде англистерге каршы француз элинин боштондук күрөшүн башкарган. Англистер басып алган Орлеан шаарын 1429-ж. 8-майда бошоткон (Орлеан кызы деген ат ушундан калган). Бир катар аймакты ээлеген соң, ал аскерлерди Реймсти көздөй баштап, 1429-ж. 17-июлда мураскер Карлды (Карл VII) такка отургузат. Элдик согуштун күчөшү менен Жанна д'Арктын кеңири белгилүү боло башташынан чочулаган король жана ак сөөктөр, аны согушка башчылык кылуудан четтетишет. 1430-ж. 23-майда Компьен шаарынын жанындагы салгылашта англистерге танапташ – бургундуктар туткунга түшүрүп, англистерге сатып жиберген. Руанда чиркөө соту Жанна д'Аркты «кудайбезер», «көз боёмочу» деп айыптап, өрттөп өлтүрткөн. 1456-ж. Францияда болгон жаңы cот Жанна д'Аркты актаган. 1920-ж. католик чиркөөсү аны эң кадырлуу ыйыктардын катарына кошкон.
Колдонулган адабияттар
түзөтүү- “Кыргызстан”. Улуттук энциклопедия: 1-том. Башкы ред. Асанов Ү. А., Б.: Мамлекеттик тил жана энциклопедия борбору, 2006. ISBN 9967—14—046—1