Жумакаева Тамара

Жумакаева Тамара (1942-ж. т., Нарын району, Куланак айылы - 2008) — артист, ырчы. Кыргыз Республикасынын эл артисти (1984, эмгек сиңирген артист, 1974).
1953—55-ж. ал Күрөңкеев атындагы музыкалык окуу жайынын бий, балет, виолончель класстарында окуган. 1959-ж. 8-классты бүткөндөн кийин Республикалык көркөм өнөр фондусунун цехинде иштеген.
1960-ж. Тянь-Шань облустук музыкалык драма театрына кабыл алынган. Атайын артисттик билими жок болсо да, өзунүн музыкалык жөндөмдүүлүгү, дилгир сезгичтиги менен көптөгөн спектаклдерде каармандардын ички дүйнөсүн терең ачып берген, ролдорду зор чеберчиликте аткарууга жетишкен.
Аткарган негизги ролдору: Кукуя (К. Маликов, "Алмаш"), Үлпөт (Ж. Садыков, Т. Мамбетов, «Эми эмне болот»), Толкун (Ж. Абдыкадыров, "Толкун"), Жыпаргүл (Т. Абдумомунов, «Атабектин кызы»), Айнагүл (К. Жантөшев, "Шайтан кыз"), Томаяк бала (Б. Жакиев, "Миң кыял"), Комиссар (В. Вишневский, "Оптимисттик трагедия"), Айдан, Тамара (С. Шимеев, «Өмүр жөнүндө баян»), Дарыйка (Б. Өмүралиев, "Жаңырык"), Полина (Н. Анкилов, "Жоокердин жесири"), Клея (Фигейредо, «Эзоп»), Акбара (Ч. Айтматов, "Кыямат") жана башка. Ал кыргыз элине драмалык эле эмес, мукам үндүү ырчы катары да таанымал. Ж. Шералиев, К. Тагаев, С. Мамбетбаев, Э. Мааданбековдордун обондорун ийине жеткире чебер аткарат. М. Рыскулов атындагы сыйлыктын лауреаты (1992).
Анын чыгармачылыгы жөнүндө Д. Абдылдаева «Эл кызы — Нарын жылдызы» аттуу китеп жазган (1996).

Колдонулган адабияттар

Асанов.У, Асаналиев.З, Атабаев.А “Нарын обласына 70 жыл.Энциклопедия”-,Бишкек, 2009
Нарын облусу: Энциклопедия / Башкы редактору А.Карыпкулов; Ред. Кеңештин төрагасы академик Үсөн Асанов. – Бишкек: Кыргыз Энциклопедиясынын Башкы редакциясы, 1998. – 420 бет, илл. - ISBN 5-89750-100-9.

Интернеттеги шилтемелер

ТАЛАНТ ТАГДЫРЫ: ТАМАРА ЖУМАКАЕВА
Таңшыган үндүү Тамара(жеткиликсиз шилтеме)
Тайгак кечүүдөн кийинки бийиктик…(жеткиликсиз шилтеме)
"ЭЛЕСИ ЭСТЕ, ЫРЛАРЫ ЭЛДЕ": ТАМАРА ЖУМАКАЕВА