Калигула

Калигула Гай Юлий Цезарь (латынча caligula — өтүкчү; мындай атты кичинекей чагында аскердин өтүгүнө окшогон өтүктөрдү кийген үчүн алып калган) (12, Анциум — 41, Рим) — Рим императору (37-жылдан); Юлий — Клавдийлердин династиясынан, Германиканын уулу, Тиберийдин ордун басуучу. Ал чексиз бийлик жүргүзүүгө аракеттенген. К. мамлекеттик каражаттарды (преториандар үчүн сыйлыктарды, триумфтарды, оюн-тамашаларды уюштуруу жана башка) короткону үчүн байлардын (өзгөчө сенаторлордун) байлыктарын конфискациялап жана салыктарды көбөйткөн. Калигуланын мүнөзүнүн катаалдыгы преториандардын жана сенаторлордун нааразычылыгын туудуруп, өзүнүн хан сарайында Кассий Херей тарабынан өлтүрүлгөн.

Колдонулган адабияттар

“Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104 -9