Картахена
Картахена, Картахена-де-Индиас – Колумбиядагы шаар. Боливар департаментинин административдик борбору. Кариб деңизинин жээгинде, Магдалена дарыясындагы деңиз порту (жылына 7 млн т жүк ташылат). Калкы 885,7 миң (2008). Жол тоому. Эл аралык аэропорту бар. Нефть ажыратуу, тамак-аш, цемент, химиялык өнөр жай ишканалары иштейт.
Шаар 1533-жылы негизделген. Кул соодалоонун борбору болгон. Картахенанын тарыхый борборундагы 3 квартал (ак сөөктөр, соода жана элдик) Бүткүл дүйнөлүк мурастын тизмесине киргизилген. 16–18-кылымдардын чептери, чиркөөлөрү, монастрлар жана соборлор сакталган. Өлкөнүн башкы ишкер, соода (зер буюмдар, асыл таштар) жана өнөр жай борбору. Машина куруу (анын ичинде кеме ремонттоо), жеңил жана тамак-аш, нефть ажыратуу (Кариб деңизинин жээгиндеги жана өлкөдөгү эң ири; кубаттуулугу суткасына 75 миң баррель; 2010-жылы кубаттуулугу суткасына 140 миң баррелге жеткирилет) ишканалары иштейт. Университеттер, музейлер, китепканалар бар. Картахенада ЭКФ (1961-жылдан) өткөрүлүп турат.
Колдонулган адабияттар түзөтүү
- “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9