Компрессор

Компрессор – абаны, газды, бууну кысууга арналган пневматикалык механизм. Кысылган аба, өнөр жайында жана тоо-кен өндүрүшүндө бургулоо иштерин жүргүзүүдө коркунучсуз энергия булагы катары пайдаланылат. Ошондой эле буу турбиналык кыймылдаткычта колдонулат. Жөнөкөй Компрессор алдыга-артка кыймылдоочу поршендүү цилиндрден турат. Капкагында соргуч жана толтургуч клапандары жайгашкан. Цилиндрлер улам кийинки баскычтарга биригет жана алардын ар биринин кысуу деңгээли 7:1ге чейин. Кыскан маалда газ ысый баштайт да, муздатуучу система талап кылынат. Кысылган газ май чачылып муздатылат. Жогорку кубаттуулуктагы Компрессорлорго жогорку айлануудагы радиустук жана октук (өзөктүк) турбокомпрессорлор кирет.

Колдонулган адабияттар

• “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104 -9