Коңур-Өлөң мөңгүлөрү

Коңур-Өлөң мөңгүлөрү – Тескей Ала-Тоонун түндүк капталындагы татаал өрөөн тибиндеги 2 мөңгү (Чыгыш жана Батыш). Ак-Терек суусунун оң курамы – Коңур-Өлөңдүн башында жайгашкан. Чыгыш мөңгүсүнүн узундугу 5,8 км, аянты 11,0 км², абляциясынын аянты 6,1 км². Мөңгүнүн башы деңиз деңгээлинен 4760 м, этеги 3360 м бийикте жатат. Кар чегинин бийикт. 3920 м. Куралуу аймагы эки ири мөңгүнүн биригишинен пайда болот. Этегинин калыңдыгы 25–30 мге жетет. «Тилинин» учу менен азыркы моренанын аралыгы 35–40 м. Батыш мөңгүсүнүн узундугу 3,5 км, аянты 5,8 км², абляциясынын аянты 3,8 км². Мөңгүнүн башы деңиз деңгээлинен 4700 м, этеги 3440 м бийикте жатат. Кар чегинин бийиктиги 3900 м. Мөңгүнүн бети бир аз жантайыңкы, тегиз. Азыркы этек моренадан 2 км төмөндө дагы мореналардын үйүлүп жатышы мөңгүнүн акырындык менен тартылып бараткандыгына күбө. Мөңгүлөрдөн Коңур-Өлөң суусу башталат.

Колдонулган адабияттар

• “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9