Медициналык тез жардам

Медициналык тез жардам – катуу кармаган ооруларда, түрдүү кырсыктан адамдын ден соолугуна, өмүрүнө коркунуч туулганда шашылыш медициналык жардам көрсөтүү кызматы. Жапа чеккендерге медициналык тез жардам кырсык болгон жерде (көчөдө, үйдө, жумушта), оорулууну ооруканага алып баратканда ж. б. учурларда көрсөтүлөт. Андан тышкары оорулууну, төрөй турган аялды стационардык дарылоо мекемелерине жеткирет. Медициналык тез жардам көрсөтүүгө атайын мекемеден тышкары борборлоштурулган диспетчерлик кызмат, радиолошкон медициналык машина, реанимация бөлүмү көмөктөшөт. Медициналык тез жардам машинасы телефон байланышы, дем алдыруучу, наркоз берүүчү аппараттар, портативдүү электр кардиограф ж. б. менен жабдылган. Ири шаарларда медициналык тез жардам берүүчү атайын бригадалар түзүлгөн. Тез жардам станциясы жок жерде медициналык жардамды бардык дарылоо, алдын алуу мекемелери көрсөтүүгө милдеттүү. Алыскы жана жетүүгө кыйын райондорго медициналык шашылыш жардам көрсөтүүдө санавиациянын мааниси чоң.

Колдонулган адабияттар

• “Кыргызстан” улуттук энциклопедиясы: 5-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. илл. ISBN 978 9967-14-111 -7