Навигация (лат. navigatio - кемеде сүзүп жүрөм) - 1) деңизде сүзүү, кеме менен жүрүүчүлүк; 2) жергиликтүү аба ырайынын шартына жараша кеме менен жүрүүгө мүмкүн болгон жыл мезгили; 3) кеме башкаруунун теориялык негизин, практикалык ыктарын иштеп чыгуучу кеме башкаруу илиминин бөлүмү; 4) аэронавигация - учуучу аппараттарды (самолёт, вертолёт, ракета жана башка) айдоо, учуруу, башкаруу методу жана каражаттары жөнүндөгү илим. Деңиз навигациясы эзелтен белгилүү. Азыркы деңиз навигациясынын милдеттери: кеменин коопсуз жана ыңгайлуу жолун тандоо, навигациялык аспаптар жана приборлор менен анын жүрүү багытын, ордун, басып өткөн жолунун узундугун аныктоо; сырткы таасирлерге жараша кеменин жүрүү багытынын өзгөрүшүн эсепке алуу; кеме башкаруунун ыңгайлуу картографиялык проекцияларын изилдөө, тандоо жана аларга карата аналитикалык жана графикалык ыкмалар менен навигация маселелерин чечүү. Навигациянын төмөнкү түрлөрү бар: автомобиль навигациясы, асир навигация, бионавигация, аба навигациясы, инерциялык навигация, маалымат навигациясы, космостун навигациясы, деңиз навигациясы, радионавигация, спутник навигациясы, жер астындагы навигацияда радиоэлектрондук түзүлүшаарынавигатор (навигациялык жабдык) пайдаланылат.

Булактар түзөтүү

“Кыргызстан” улуттук энциклопедиясы: 5-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. илл. ISBN 978 9967-14-111 -7