Тальк
Тальк – силикаттар классындагы минерал. Химиялык курамы Mg3Si4O10(OH)2. Моноклин системасында кристаллданат. Түссүз, агыш, жашыл сымал. Жумшак. Майланышкандай жылма. Катуулугу Моос шкаласы боюнча 1. Салыштырма салмагы 2,58–2,83. Ультра негиздүү тоо тектердин гидротермдик өзгөрүүсүнөн жана метаморфизмдин негизинде пайда болот; көбүнчө кремнийлүү доломиттерде кезигет. Тальк резина жана кагаз даярдоодо, медицинада, парфюмерия-косметикада, техникада (айрыкча электр изоляция материалы катары, кургак майлоочу зат), карапа алууда ошондой эле ж. б. өнөр жайда колдонулат.
Колдонулган адабияттар
түзөтүү- “Кыргызстан” улуттук энциклопедиясы: 6-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. 816 бет, илл. ISBN 978 9967-14-117-9