Чаңгет (суу)
Чаңгет – Сузак районундагы суу, Көгарт суусунун сол куймасы. Фергана тоо тизмегинин түштүк-батыш капталынан башталат. Узундугу 75 км, алабынын аянты 381 км2. Суу куралуу аянтынын орточо бийиктиги 1640 м. Башы Орказган, ортоңку бөлүгү Ийри-Суу аталат. Негизинен кар (60 %), жаан-чачын (30%) жана булак сууларынан куралат. Чаңгеттин 10 куймасы бар; ирилери: Чоң Таш, Ийрисуу жана башкалар. Жазында кирип, жайында тартылат. Режими боюнча алтай тибиндеги дарыялар тобуна кирет. Ташкындарда көп байкалат. Көп жылдык орточо чыгымы Чаңгет кыштак тушта 2,3 м3/сек; эң көп чыгымы апрелде (15,8 м3/сек), эң азы сентябрда (0,9 м3/сек) байкалат. Сугатка пайдаланылат. Боюнда Чаңгет, Барпы кыштактары жайгашкан.
Чаңгет
| |
|---|---|
| Мүнөздөмө | |
| Узундугу | 75 км |
| бассейндин аянты | 381 км² |
| Жайгашкан орду | |
| Өлкө |  Кыргызстан
|
| Област | Жалал-Абад облусу |
| Район | Сузак району |
Колдонулган адабияттар түзөтүү
- Мамлекеттик тил жана энциклопедия борбору. Кыргызстандын географиясы ISBN 9967-14-006-2