Камерун жанар тоо

Камерун жанар тоо (порт. Piodes camarones — «креветкалуу дарыя» деген мааниде) — Батыш Африкадагы жанар тоо массиви, Гвинея булуңунун жээгинде. Камерун мамлекетинин аймагында. Капталдары жантайыңкы, көптөгөн каптал конустары (100дөн ашык) жана кратерлери бар домпок (бийиктиги 4100 м), трахибазальттуу стратожанартоо. Эң бийик жери 4070 м (аракеттеги Фако жанар тоо конусу; акыркы жолу 2000-жылы атылган). Батыш жана түштүк-батыш капталдары Африканын эң жаанчыл жери, Дебунжада жылына 9655 мм чамасында жаан-чачын жаайт. Капталдарын нымдуу тропик токою, дайыма жашыл тоо токою жана шалбаасы ээлейт.

Камерун жанар тоо (кратерлер)

Булактар

• “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9