Кара-Шоро өрөөнү
Кара-Шоро өрөөнү – Фергана тоо тизмегинин түштүк-батыш капталындагы бийик тоо өрөөнү, капчыгай, жайлоо, кооз жер. Өзгөн районунун аймагында. Оштон 130 км, Жалал-Абаддан 110 км, Өзгөндөн 75 км аралыкта. Капчыгайдын таманы анча жазы эмес. 2100–2300 м бийиктикте жатат. Чыгыштан батышка 26 кмге созулат; туурасы 5–6 км. Каптал капчыгайлары (Чабай, Качыралы-Төр, Чоң жана Кичи Кулубек, Аксур) кокту-колоттуу келип, кыска.
Климаты континенттик. Декабрь–февраль айлары ызгаардуу (–15... –20°С), жайы жылуу (12–15°С). Жылдык жаан-чачыны 1000 ммге чейин. Жайылмаларда жана тоо этектеринде тал, терек, кайың, долоно, табылгы карагат, шилби, жылгын, ит мурун, ыргай жана башка өсөт. Тоо капталдарына арча-бадал аралашкан бийик чөптүү шалбаа (2900–3000 мге чейин), субальп жана альп шалбаалары жана шалбаалуу талаа, нивалдык-гляциалдык ландшафт алкактары мүнөздүү. Качыралы-Төр капчыгайынын ичи өзгөчө кооз, мында токой аралаш бийик чөптүү шалбаа жана жылаңач аскалуу беттер жатат. Минералдуу суулары бар (к. Кара-Шоро минералдуу суусу). Экотуризмге ылайыктуу жер.
Колдонулган адабияттар
түзөтүү- “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9
- Кыргызстандын географиясы Archived 2014-07-14 at the Wayback Machine ISBN 9967-14-006-2