Кашкар бөрү карагаты

Кашкар бөрү карагаты (лат. Berberis kaschgarica, Rupr. 1869) - Бийиктиги 0,5 см ден 1 м ге чейин жеткен, жыш бутактанган, муун аралыктары кыска бадал. Бутактары күрөң сымал, тикенектүү үч бөлүктүү, узундугу 15 мм, жалбырактарынан ашып турат. Жалбырактары майда, узундугу 15 мм, туурасы 6 мм, кыска жалбырак саптуу, сүйрү жумуртка сымал, терилүү, бүтүн кырдуу же капталында жылгыз учтуу тишчелүү. Гүлдөрү жалгыздан же 2-3 даанадан жалбырак колтугунда жайгашкан. Чөйчөкчө жалбыракчалары учсуз, жумуртка сымал. Желекчесинин учу кесилген-оюкчалуу, аталыгынан эки эсе узун. Мөмөсү - жазы жумуру, жемиши кара, узундугу 8 мм ге чейин.

Биологиялык өзгөчөлүктөрү

Май-июнда гүлдөп, августта мөмөлөйт. Уругу аркылуу көбөйөт.

Жалпы жана өлкөдө таралышы

Тибет, Кашкар (Батыш Кытай), Чыгыш Памир (Тажикстан), Борбордук Тянңшанң (Кыргызстан, Сарыжаз дарыясынын бассейни).

Өсүү шарттары

Таштуу адырлар, эски мореналар, сырттар. Деңиз деңгээлинен 4300 м ге чейинки бийиктиктерде учурайт.

Саны

Аз санда, жалгыздап кездешет.

Чектөөчү факторлор

Түрдүн популяциялары кездешкен аймактарды чарбачылыкка өздөштүрүү.

Өстүрүү

Атайлап өстүрүү боюнча маалымат жок.

Уюштурулган коргоо аракеттери

Кыргыз ССРинин Кызыл китебинде катталган (1985).

Коргоо үчүн зарыл аракеттер

Түрдүн санын, биологиясын изилдеп, ал кеңири таралган жерлерде ботаникалык заказник уюштуруу керек.

Статусу

VU. Сейрек кездешүүчү түр.

Колдонулган адабияттар

• Кыргыз Республикасынын Кызыл китеби 2-басылышы – Бишкек: 2006. – 544 б. – ISBN 9967-23-367-2