Көк-Кыя кырка тоосу

Көк-Кыя кыркы тоосу — Ак-Сай өрөөнүнүн түштүгүндө. Какшаал тоо тизмегине кирет. Узундугу 20–25 км. Басымдуу бийиктиги 4200–4400 м, эң бийик жери 4843 м.

Кырына байыркы тайпак жерлер мүнөздүү. Түштүк бети өтө тик (65–70°), батыш бөлүгү бийик (4200–4500 м), зор капчыгайлар кесип өтөт (Көк-Кыя каньону). Түзүлүшү боюнча горстантиклиналь. Байыркы муз каптоонун издери байкалат. Палеозойдун гранит, сланец, кумдук, акиташ тектеринен турат. Түштүк-чыгышында мөңгүлөр бар. Бийик тоолуу субальп талаасы (3500–3800 м), альп талаасы жана шалбаалуу талаа ландшафттары мүнөздүү (3800–4300м), тоо бетинде негизинен шыбак, доңуз сырты, бетеге өсөт. Кышкы жайыт.

Колдонулган адабияттар

• Мамлекеттик тил жана энциклопедия борбору. Кыргызстандын географиясы. Archived 2014-07-14 at the Wayback Machine ISBN 9967-14-006-2
• Кыргызстан географиясы / Мамлекеттик энциклопедия борбору. – Бишкек, 2004. - ISBN 9967-14-006-2.