Мойдунов Эрмек
Мойдунов Эрмек (10. 8. 1945-жылы туулган, Ош. областы, Кара-Суу району, Жапалак айылы) – ырчы.
Кыргыз Республикасынын эл артисти (1994).
М. Күрөңкөев атындагы музыкалык-хореографиялык окуу жайында окуган (1962–67), Б. Бейшеналиева атындагы искусство институтун бүтүргөн (1977). 1967-жылдан Т. Сатылганов атындагы Кыргыз мамлекеттик филармониясынын Ч. Кожомжаров жетектеген эстрада ансамблинде, 1970-жылдан К. Орозов атындагы эл аспаптар оркестринде, 1994–99-жылдары филармонияда солист, директордун орун басары, 1999–2012-жылдары Кыргыз Улуттук консерваториясында окутуучу болуп иштеген. Алгач 1967-жылы обончу А. Атабаевдин «Эне жөнүндө баллада» аттуу обондуу ырын аткаргандан кийин белгилүү болгон. Мойдунов М. Рыскулбековдун («Эсте энелер», «Сапарлашыма», «Саргарган гүл», «Күтүү вальсы»); Т. Казаковдун («Эстелик», «Шумкар»); С. Жумалиевдин («Сен менин жазылбаган ырларымсың», «Кетпейм сага жолукмайынча»); К. Молдобасановдун («Жайлоодо»); А. Огомбаевдин («Күйдүм чок»); З. Иманалиевдин («Накинай» ж. б. обончулардын ырларын зор чеберчиликте аткарган. СССРдин союздук республикаларында жана көптөгөн чет өлкөлөрдө гастролдо болгон. КМШ жана көптөгөн чет өлкөлөрдө гастролдо болгон. Медалдар менен сыйланган.
Колдонулган адабияттар
түзөтүү- “Кыргызстан” улуттук энциклопедиясы: 5-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. илл. ISBN 978 9967-14-111 -7