Жети-Өгүз минералдуу суусу
Жети-Өгүз минералдуу суусу - Ысык-Көл облусунун Жети-Өгүз районундагы дарылык касиети бар минералдуу жылуу суу булактары. Каракол шаарынан 28 км түштүк-батыш тарапта, Тескей Ала-Тоонун түндүк капталында, Жети-Өгүз суусунун боюнда, деңиз деңгээлинен 2200–2400 м бийиктикте. Ысык булактар жергиликтүү элге илгертен белгилүү. Булактар чыккан аймакта протерозойдун метаморфизмделген сланецтери жана аны жиреп чыккан гранит интрузиясы, карбондун акиташ, кумдук, алевролит тектери юранын конгломераттары жана палеоген-неогендин кум-чополуу тоотектери жатат. Жылуу суулар акиташ тектериндеги тектоникалык жаракалардан агып чыгат. Ошондой эле 150 м тереңдиктен бургулаганда да суу чыккан. Дебити 2,7 л/сек. Химиялык курамы, физикалык касиети боюнча радондуу, хлорид-натрий-кальцийлүү, чала жегичтүү (рН 7,3–7,6) арашан сууларына кирет. Температурасы 25–42°С. Жалпы минералданышы 0,9дан 13 г/л ге чейин. Түссүз, жытсыз, даамсыз. Курамында бром, йод, бор, марганец, жез, никель, коргошун, цинк, алюминий бар. Биологиялык активдүү компоненти радон, анын өлчөмү 18–400 Махе бирдигине же 127,410–8 кюри/лге чейин. Эсептелген запасы 0,4452 миң м3/сутка (1965). Муун, нерв жана гинекологиялык ооруларына шыбаа берет. Суунун базасында Жети-Өгүз курорту иштейт.
Колдонулган адабияттар
түзөтүү- Кыргызстандын кен байлыгы: Энциклопедиялык окуу куралы/Мамлекеттик тил жана энциклопедия борбору. Бишкек – 2004, ISBN 9967-14-009-7
 |
Бул макалада башка тил бөлүмүнө шилтеме жок. Сиз аларды издеп бул макалага кошуп, долбоорго жардам берсеңиз болот.
|