Кара-Үңкүр суусу

Кара-Үңкүр же Тентек-Сай суусу ― Кара-Дарыянын оң куймасы, Базар-Коргон району аркылуу агат. Фергана тоо кыркасынын түштүк-батыш капталынан башталган Жазы-Кечүү жана Бабаш-Ата кырка тоосунан түшкөн Кызыл-Үңкүр сууларынын кошулушунан түзүлөт.

Узундугу 127 км, алабынын аянты 4130 км². Төмөнкү агымында бир нече куймалары бар. Эң ири куймалары: Арстанбап, Гава-Сай, Шайдан-Сай, Алаш-Сай, Шаркыратма. Алабында жапайы жаңгак-мөмөжемиш токойлуу табигый кооз аймактар – Кызыл-Үңкүр өрөөнү жана Арстанбап өрөөнү жайгашкан. Чарбак кыштагы туштагы жылдык орточо чыгымы 29,6 м3/сек; эң көбү 85,7 м3/сек (май), эң азы 9,64 м3/сек (январь). Негизги куймалары: Арстанбап, Шайдан-Сай, Кызыл-Үңкүр, Жаз-Кечүү жана башка Суусун толук пайдалануу үчүн Базар-Коргон суу сактагычы (көлөмү 22 млн м3) курулган. Сугатка пайдаланылат.

Жээгинен Кызыл-Үңкүр, Ооган-Талаа, Ак-Булак, Арстанбап, Чарбак, Абдураимов атындагы (Совет), База-Коргон жана башка кыштагы орун алган.

Колдонулган адабияттар

• “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9