Неаполь

Неаполь
Өлкө	Италия
Облус	Кампания
	Тарыхы жана Географиясы
	Калкы
Расмий тили	Италян тили
Калкы	1,0 миллион (2010) адам
Диний курамы	Католиктер
Этнохороним	Неаполитандыктар
	Сандык идентификаторлор
Телефон коду	+39 081
Почта индекстери	80121 - 80147
Автоунаа коду	NA
Расмий сайты	шилтеме Калып:Ref-Италян тили

Неаполь — Түштүк Италиядагы шаар. Тиррен деңизинин Неаполь булуңунун жээгинде, Везувий жанар тоосунун этегинде жайгашкан. Кампания облусунун жана Неаполь провинциясынын административдик борбору. Калкы 1,0 миллион (2010). Эл аралык аэропорту бар. Метрополитен иштейт. Порт (жылына 10 миллионтдан ашык жүк ташылат). Өлкөнүн түштүгүндөгү маанилүү экономикалык жана маданий борбор. Нефть ажыратуу, нефть-химиялык, металлургия, машина куруу (анын ичинен кеме куруу, электр-техникалык), жеңил, тамак-аш (ири макарон фабрикалары), кагаз өнөр жай ишканалары иштейт. Университет(1224), музейлер (анын ичинен Европадагы эң ири археологиялык, Сан-Мартино, улуттук жана башка), Каподимонте сүрөт галереясы, «Сан-Карло» опера театры (18-кылым), консерватория (1806) бар.

Тарых

Мурда Грекиянын ээлиги болгон. Биздин заманга чейинки 327–26-жылы Рим жеңип алган, биздин замандын 5–6-кылымында Византия бийлигинин астында, 13-кылымдын 2-жарымынан Сицилия королдугунун, 1282–1442-, 1501–04-, 1806–15-жылы Неаполитан королдугунун, 1815–60-жылы эки королдуктун тең борбору болгон. Соңку христиан катакомбалары, Сан-Жованни баптистерийи (5-кылым), Кастель дель Ово (12-кылым) жана Кастель Нуово (13–15-кылым) сепилдери, көптөгөн готика, ренессанс жана барокко стилиндеги чиркөөлөр, ак сарайлар, Чертоза ге Сан-Мартино кечилканасы (14–17-кылым), Неапольдан түштүк-чыгышта байыркы Помпей шаарынын калдыктары сакталган. Неаполь эл аралык туризмдин борбору.

Булактар

“Кыргызстан” улуттук энциклопедиясы: 5-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. илл. ISBN 978 9967-14-111-7
https://www.comune.napoli.it Шаардык коммунанын расмий сайты