Фламанддар

Фламанддар - герман тилдүү топтогу эл, Бельгиянын жергиликтүү калкы.

Жалпы саны 7 млн 230 миң киши (2010). 5 млн Бельгияда (Фландрия), 1,7 млн Нидерландда (түштүгүндө), 250 миң Франциянын Бельгия менен чектеш жерлеринде жашайт. Нидерландда жашаган Фламанддар голланддарга сиңишип, алар менен бир улутка айланган. Нидерланд тилинде сүйлөшөт. Динге ишенгендеринин көпчүлүгү - католик. Фламанддардын этностук негизин франк, сакс жана фриз уруулары менен аралашып кеткен франктардын батыш герман, ошондой эле кельт уруулары түзгөн. Этнос катары 17-19-кылымдарда калыптанган. Нидерланд буржуазиалык революциясынан (16-к.) кийин фламанддар бытырап, көпчүлүгү Испания бийлигинде калган. 1830-ж. фламанддар менен валлондор биригип, көз карандысыз Бельгия мамлекетин түзгөн. Салттуу кийим-кечектери голландыктарга окшош. Аялдары - көйнөк, кофта, корсаж, юбка, алжапкыч, башына чепец кийип, түстүү же клеткалуу шалы жоолук салынат. Тамак-ашы негизинен - жашылча, балык азыктары, took сорпосу. Майрам күндөрү пирог жана булочка даярдашат.

Колдонулган адабияттар

• «Кыргызстан». Улуттук энциклопедия: 7-том / Башкы ред. Ү. А. Асанов. К 97. Б.: «Кыргыз энциклопедиясы» башкы редакциясы, 2015. - 832 б., илл. ISBN 978-9967-14-125-4