Берберлер - Түндүк Африка өлкөлөрүндө (Мавритания, Марокко, Алжир, Тунис, Ливия, ЕАР), ошондой эле Борбордук жана Батыш Суданда жашаган элдердин тобу.

Жалпы саны 6 млн-дон ашык (1967). Берберлер деген ат Түндүк Африканы арабдар караткандан (7-к. ) бери белгилүү. Антроп. жагынан жер ортолук деңиз расасына кирет. Байыркы ливиялыктардын укум-тукумдары деп саналат. Арабдар караткан соң бербер урууларынын көбү араб маданиятын, каада-салтын, тилин, динин кабыл алышкан. Арабдашпаган, б. а. бербер тилдеринде сүйлөгөндөрү гана Берберлер деп аталат. Берберлер негизинен жер иштетип, мал багышат. Марокко менен Алжирдеги Берберлердин айрымдары өнөр жайда иштейт.

Колдонулган адабияттарОңдоо

Кыргыз Совет Энциклопедиясы. Башкы редактор А. Табалдиев. -Фрунзе: Кыргыз Совет Энциклопедиясынын башкы редакциясы, 1976. Том 1. А - Бюулук -608 б.